Yanvarın 25-də Rəsul Rza ev Muzeyində görkəmli ədibimiz Ənvər Məmmədxanlının anım günü ilə əlaqədar “Nəsrin şairi” adlı tədbir keçirilmişdir. Tədbiri giriş sözü ilə açan muzeyin bələdçisi G.Ağayeva şəhər 3 saylı məktəbin 4-5-ci sinif şagirdlərini və müəllimlərini salamlayaraq Ə.Məmmədxanlının həyat və yaradıcılığı haqqında məlumat vermişdir. Natiq qeyd etmişdir ki, görkəmli ədibimiz Ə.Məmmədxanlı elə ilk əsərlərindən etibarən öz mövzuları, öz üslubu ilə ədəbi ictimaiyyətin xüsusi marağına səbəb olmuş, özünəməxsus yaradıcılıq yolu keçmişdir: “Ənvər Məmmədxanlı unudulan sənətkar deyil və onun ədəbiyyat tariximizdə özünəməxsus yeri var. Onun əsərləri keçmiş günlərdə, bu gün də sevə-sevə oxunur”.

            Tədbirin davamında məktəblilər hazırladıqları Ənvər Məmmədxanlının həyat və yaradıcılığı haqqında məlumatlar vermiş, hekayələrindən parçalar söyləmişlər. Rayon Mədəniyyət Mərkəzinin Xalq teatrının aktrisası Təranə Mahmudova ədibin “Buz heykəl” hekayəsini məktəblilərə təqdim etmişdir. Himnin ifasıyla tədbir başa çatmışdır.