27.09.2018
Məlum olduğu kimi sentyabrın 18-dən 26-dək ölkəmizin hər yerində dahi bəstəkar, Azərbaycan peşəkar musiqisinin banisi Üzeyir Hacıbəyliyə həsr olunmuş X Beynəlxalq Musiqi Festivalı keçirilir. Bu münasibətlə 25 sentyabr 2018-cı il tarixdə Ağdaş rayon Mərkəzi kitabxananın oxu zalında “Üzeyir musiqisinin dühası” adlı musiqili tədbir keçirildi. Tədbiri giriş sözü ilə Ağdaş rayon MKS-nin direktoru Seyfəddin Feyzullayev açdı. O bildirdi ki, Azərbaycan musiqisinin inkişafında böyük xidmətləri olan dahi Üzeyir Hacıbəylinin bəstəkar, alim, yazıçı, publisist, ictimai- siyasi xadim kimi çoxşaxəli fəaliyyəti olmuşdur. O, həm də Şərqdə ilk operanın banisi kimi məşhurdur. Artıq 10 ildir ölkəmizdə dunya musiqi xəzinəsinə parlaq incilər bəxş edən Üzeyir Hacəbəylinin doğum günündən sonrakı həftə ərzində Beynəlxalq Musiqi Festivalı keçirilir.
Daha sonra Azərbaycan musiqisi haqqında video-çarx nümayiş etdirildi. Üzeyir Hacıbəylinin dahi azərbaycan şairi Nizami Gəncəvinin sözlərinə bəstələdiyi “Sənsiz” və “ Sevgili canan” romansları Azərbaycanın korifey sənətkarları Bülbülün və M. Maqomayevin ifasında dinlənildi. Hər iki romans tədbir iştirakçılarında xoş duyğular oyatdı.
Tədbir 18-26 sentyabr X Beynəlxalq Musiqi Festivalı-rubrikalı “18 Sentyabr-Milli Musiqi Günüdür” adlı sərgiyə baxışla sona çatdı.