Mərkəzi Aran Regional Mədəniyyət İdarəsi

Xəbərlər

”Xalqın mədəni sərvəti” layihəsi növbəti dəfə Cabbar Qaryağdıoğlunun xatirəsinə həsr olunub

28.03.2024

Fikrət Əmirov adına Gəncə Dövlət Filarmoniyası 27-29 mart tarixlərində Azərbaycan Respublikası Mədəniyyət Nazirliyinin dəstəyi, Gəncə-Daşkəsən və Mərkəzi Aran Regional Mədəniyyət İdarəsinin təşkilatçılığı ilə “Xalqın mədəni sərvəti” layihəsini təqdim edir.

Üçüncü dəfə keçirilən layihə Azərbaycan xanəndəlik sənətinin görkəmli nümayəndəsi Cabbar Qaryağdıoğlunun əziz xatirəsinə həsr olunub.

Görkəmli xanəndə Cabbar Qaryağdıoğluna həsr olunmuş layihənin ilk günü Mərkəzi Aran Regional Mədəniyyət İdarəsinin təşkilatçılığı ilə Ağdaş rayon Heydər Əliyev Mərkəzində konsert proqramı təqdim edilib. Ağdaş şəhər Habil Əliyev adına 1 nömrəli, Ağdaş rayon Ləki qəsəbə, Yevlax şəhər 1 nömrəli, Yevlax şəhər 2 nömrəli, Yevlax rayon Aran qəsəbə, Yevlax rayon Xaldan kənd, Yevlax rayon Malbinəsi kənd uşaq musiqi məktəblərinin müəllim və şagirdləri, Göyçay rayon Mədəniyyət Mərkəzinin və Yevlax şəhər Mədəniyyət Mərkəzinin əməkdaşları muğam və təsniflər, xalq mahnılarından ibarət geniş konsert proqramı ilə çıxış ediblər.

Qeyd edək ki, "Xalqın mədəni sərvəti" layihəsi 8-14 yanvar tarixlərində simfonik muğam janrının banisi Fikrət Əmirova, 14-16 fevral tarixlərində görkəmli bəstəkarımız Qara Qarayevə həsr olunub.